På jakt etter meining: Ei kulturanalyse av kva tilnærming norske jegerar har til elgjakt

Abstract

Denne masteroppgåva gjer ein kulturanalyse av kva tilnærming ulike jegerar har til elgjakt. Ho tek utgangspunkt i tre jaktlag, i kategoriane bygdejegerar, byjegerar og leigejegerar. Sentrale funn i samanlikninga av desse er ein del likskapar og ein felles etos som ser ut til å gjelda for jegerane på tvers av bakgrunn i dei ulike jaktlaga. Analysen startar med å drøfta skilnadar kring verdsetjing av kjøtet og jaktterrenget som kontekst. Ved å nytta sosialisering som analytisk perspektiv får vi innblikk i korleis bygdejegeren har ei særeiga sosialisering inn i jaktlaget, mens by- og leigejegerane har vorte introduserte til jakt på andre vis. Samstundes vert den uformelle sosialiseringa i jaktlaga framheva som ein viktig faktor i jegeropplæringa. Mot slutten skildrar oppgåva idealtypane «spenningsjegeren» og «opplevingsjegeren», og eg argumenterer for at det er større individuelle skilje mellom jegerane enn mellom dei tre kategoriane.